Aberteifi Aberteifi yw’r dref fwyaf ar hyd y llwybr ac mae’n cynnig ystod eang o gyfleusterau i gerddwyr. Detholiad o Ganllaw Taith Dyffryn Teifi (i’w gyhoeddi yn 2026): “Ystyr Aberteifi, yw aber Afon Teifi. Adeiladodd y Normaniaid gastell pren yma ym 1110 yn y safle strategol hwn wrth aber Afon Teifi a thros nifer o flynyddoedd, buon nhw a’r Cymry yn cystadlu am ei reolaeth. Cipiodd Rhys ap Gruffudd, Tywysog de-orllewin Cymru, gymaint o gestyll Normanaidd, gan gynnwys Aberteifi, nes i Harri’r II o Loegr ei gydnabod yn swyddogol fel yr Arglwydd cyfreithlon yn Ne Cymru. Fel yr Arglwydd Rhys, symudodd ei brif lys i Aberteifi a daeth y cyntaf i adeiladu castell carreg sylweddol ym 1171. Datblygodd Aberteifi fel porthladd o’r Oesoedd Canol o ystyried ei safle strategol fel y porth i ddyffryn ffrwythlon Afon Teifi. Erbyn y 18fed ganrif a dechrau’r 19eg ganrif, Aberteifi oedd yr ail borthladd pwysicaf yng Nghymru, a’r seithfed mwyaf yn y DU. Roedd ganddo ddiwydiant adeiladu llongau llewyrchus, gyda thros 200 o longau’n cael eu hadeiladu yn Aberteifi ac i lawr yr afon yn Llandudoch. Allforiwyd penwaig, eog, menyn, brethyn gwlân, grawn a llechi tra bod mewnforion yn cynnwys mwyn haearn, tun, glo, deunyddiau adeiladu a chalchfaen. Ym 1176, gwahoddodd yr Arglwydd Rhys feirdd a cherddorion i gystadlu mewn twrnamaint diwylliannol yng Nghastell Aberteifi. Ystyrir hyn yn sail i dreftadaeth artistig ryfeddol yr Eisteddfod Genedlaethol. Cynhelir eisteddfodau ar bob lefel o gymdeithas Cymru, o ysgolion cynradd i lefel genedlaethol a rhyngwladol. Gyda phoblogaeth o tua 4200, Aberteifi yw’r ail dref fwyaf yng Ngheredigion. Mae ganddi sîn celfyddydau cyfoes fywiog, gyda theatrau, orielau, sinema, digwyddiadau lliwgar, siopau a chaffis hynod, tafarndai a bwytai gwych. Mae Castell Aberteifi wedi’i adfer ac mae ganddo arddangosfeydd yn amrywio o’r Oesoedd Canol i’r Ail Ryfel Byd ac mae’n gwasanaethu fel canolfan i’r Gymraeg, diwylliant a pherfformiad. Canolfan Gofal Integredig Aberteifi ac Uned Mân Anafiadau – Rhodfa’r Felin, Aberteifi, SA43 1JX Swyddfa’r Post – 26 Stryd Fawr, Aberteifi SA43 1JH Archfarchnad Aldi – Y Dref Newydd, Aberteifi SA43 1NA Archfarchnad Tesco – Y Dref Newydd, Aberteifi SA43 1NA Theatr Byd Bychan – Bath-House Rd, Aberteifi SA43 1JY Theatr a Sinema Mwldan – Bath-House Rd, Aberteifi SA43 1JY Llawer o westai a thafarndai yn Aberteifi a’r cyffiniau. Llawer o gaffis a siopau annibynnol Gorsaf betrol yn Tesco Bysiau o Sgwâr Finch
